LEGAZPI CITY- Naglangkaw an kumpiyansa kan mga health workers sa Bicol na magpabakuna nin COVID-19 vaccine.
Ini an nagluwas sa latest survey na isinagibo kan Department of Health (DOH) Bicol kan nakalihis na Pebrero 2021.
Sa intrevista kan Bombo Radyo Legazpi ki DOH Bicol Health and Promotion Officer III Noemi Bron, sa 2, 167 health workers na respondents, 60.8% an nag-yes; 0.6% an no, 16.6% an dai pa sierto asin 22% an dai nagsimbag sa survey.
Naglangkaw an datos kumpara sa 31% na nagsabing “Yes” kan Enero.
An mga respondents an hali sa mga health workers na nakadesignar sa Rural Health Unit, nurses, midwives asin pharmacists.
Mientras tanto, halangkaw man an datos kan mga key leaders kan PNP sa Bicol na mawot nang makaresibe kan bakuna.
Susog sa survey sa 30 respondents, nasa 73% an nagsabi na “Yes”; 7% an “No” asin 20% man an dai pa sierto.
Pighahalat pa sa ngunyan an “go signal” kan central office para sa face-to-face survey ngani maaraman an pulso kan publiko sa pagpapabakuna.
Mientras tanto, ngunyan na aldaw na maabot an 12, 000 doses kan bakunang gibo kan Sinovac kan China sa Bicol para sa apat na pilot hospitals.
