Nanindugan si House Committee on Public Accounts Chair asin Bicol Saro Partylist Rep. Terry Ridon na kasabay na pigtatawan aksyon kan House of Representatives an oil price hike asin an impeachment complaints laban ki Bise Presidente Sara Duterte.
Ini an pahayag ni Ridon sa sarong media forum sa Quezon City bilang simbag sa pahayag kan kampo kan bise presidente na pig-eenot kan Kongreso an impeachment imbes na pagresolberan an krisis sa presyo kan langis.
Segun ki Ridon, bako totoo an siring na pahayag huli ta pwedesir sabay-sabay na ibusol kan Kongreso an mga lakdang para sa economic relief asin isyu nin accountability.
Pigtutukoy ni Ridon an ley na matao nin kapangyarihan ki Presidente Ferdinand Marcos Jr. na temporaryong suspendiron o bawasan an excise taxes sa mga produktong petrolyo enkaso magkaigwa nin matinding paglangkaw kan presyo sa world market.
Inaprobaran na ini sa ikaduwang pagbasa asin piglalaoman na maipapasar sa ikatolo asin huring pagbasa ngonian na semana.
Mientrastanto, pighahalat pa kan House Committee on Justice an pormal na simbag ni VP Sara Duterte sa ikatolo asin ikaapat na reklamong impeachment na isinangat laban saiya.
Segun ki Ridon, piglalaoman na maisusumite ini ngonian na weekend o sa Lunes.
