LEGAZPI CITY-Nagluway an pagtalubo kan factory gate prices sa nacion kan bulan nin Abril kumparar kan nakalihis na mga bulan.
Huli ini sa mas maluway na paglangkaw kan mga presyo kan mga refined petroleum products, susog sa datos kan Philippine Statistics Authority (PSA).
An Producer Price Index (PPI) para sa manufacturing sector, nag-abot nin 2.4-porsyentong paglangkaw kan Abril, mas maluway kaysa sa 2.6 porsyentong paglangkaw kan Marso.
Alagad, an pagtalubo kan Producer Price Index kan Abril, mas marikas kaysa sa 0.2 porsyentong paglangkaw kan parehong bulan kan nakaaging taon.
An Producer Price Index, iyo an nagsusukol kan average na pagbabago sa mga presyo kun saen an mga produkto kan mga domestic manufacturers ipinapabakal sa mga wholesalers sa lokal na merkado sa sarong base period.
An dibisyon kan industriya nagkontribwir nin 62.7 porsyento sa pagluya kan taonan na pagtalubo kan Producer Price Index, para sa manufacturing kan Abril.
Partikular kaini, nakapag-rehistro nin 5.3 porsyento na paglangkaw sa mga presyo kan factory gate price kan Abril gikan sa 8.2 porsyento kan Marso.
Sa natatadang 19 na dibisyon kan industriya, 16 an nakahiling nin mga paglangkaw kan Abril arog kan mga food products; mga gamit sa transportasyon; mga inomon; mga kemikal asin mga produktong kemikal asin iba pa. Sa ibong na lado, an mga dibisyon kan industriya na nagrehistro nin mga pagbaba kan Abril, kairiba an mga paper products; rubber asin plastic products; asin mga electrical equipment.
