Pinahimutikan kan kompanyang may kagsadiri kan MTKR Terranova an mga alegasyon na imbwelto an saindang tanker sa smuggling nin produktong petrolyo antes ining naglubog asin nagkawsa nin oil spill sa Bataan.
Segun kay Atty. Leonell Mojal-Infante an tagapagtaram kan Portavaga Ship Management Inc., lehitimo an operasyon kan saindang kompanya asin dae naiimbwelto sa mga iligal na aktibidad.
Kompleto man suboot sinda nin mga permit asin lisensya para sa pagbiyahe kan produktong petrolyo sa mga oil companies.
Nakahanda man an kompanya na makipagtabangan sa imbestigasyon kan gobyerno ngani na malinawan sa isyu.
Magigirumduman na sinabi kan Department of Justice asin Department of the Interior and Local Government na pig-iimbestigaran na ninda an mga report na imbwelto sa “paihi system” an tanker.
An “paihi system” an apod sa iligal na paglilipat nin produktong petrolyo sa sadit na barko ngani na makalikay sa pagbabayad nin buwis.
