LEGAZPI CITY — Nagsasagibo na nin follow-up operation an mga otoridad para sa posibleng pagkakabisto asin pag-arestar sa mga hold-upper na nangbiktima sa sarong kolektor sa Catanduanes.
Binisto an biktimang si Alma Tesorero, 35-anyos, kolektor kan sarong lending company asin residente kan Barangay Mintay, sa banwaan kan Bato sa nasambitan na probinsya.
Susog sa isinagibong imbestigasyon kan Bato Municipal Police, nangyari an insidente sa Sitio Balongbong, Barangay Sibacungan kun sain lunad kan saiyang motor si Tesorero pasiring sa kumpanya ngani na magremit kan saiyang koleksyon.
Inapaan sya kan duwang nakabonnet na suspek asin tinutukan nin badil.
Dae na nakapalag an biktima kan kuahon kan mga ini an saiyang bag na may laog na duwang pidaso nin booklet, loan application forms, calculator, white tape, ATM card, personal na kwartang otso-sientos pesos asin cash gikan sa saiyang koleksyon na maabot sa P170,000.
Nagdalagan suboot an mga suspek sa bulod na parte kan lugar makalihis an insidente.
