LEGAZPI CITY—Arestado an sarong indibidwal sa ikinundusir na operasyon katakod kan ilegal na droga sa Barangay Cawayan sa banwaan kan Bacacay, Albay.
Binisto an suspek na si alyas “Pedring”. 34-anyos, sarong barbero asin residente kan nasabing banwaan.
Naarestar ini sa linaw kan Search Warrant No. B-08 na iniluwas kan Marso 31, 2026.
Nakumpiskar saiya an 13 pakete kan pigtutubudang shabu na may kabilogang gabat na labi 25.5 gramos asin pigkarkulong may kantidad na P173,400.
Afuera digdi, nakumpiskar man sa suspek an iba pang drug paraphernalia siring kan aluminum foil, plastic sachet, lighter, asin iba pang gamit na pigtutubudang may kinaaraman sa paggamit nin ilegal na droga.
Isasairarom an mga nakuang ebidensya sa pagsusuri kan Regional Forensic Unit 5.
Ginibo an operasyon sa pinagsarong operatiba kan Bacacay Municipal Police Station, Albay Police Provincial Office Provincial Intelligence Unit asin Philippine Drug Enforcement Agency (PDEA) Region 5.
Sa presente nasa kustodiya na kan kapulisan an suspek asin mahahampang sa kasong pagbalgar sa Section 11, Article II kan Republic Act 9165 o ang Comprehensive Dangerous Drugs Act of 2002.
