LEGAZPI CITY – Binigyang-diin ng grupo ng mga mangingisda na lahat ng Pilipino ay maaapektuhan ng tumitinding tensyon sa Gitnang Silangan, lalo na ang banta ng malaking pagtaas ng presyo ng langis.
Ayon kay Pambansang Lakas ng Kilusang Mamamalakaya ng Pilipinas (PAMALAKAYA) Secretary General Salvador France sa panayam ng Bombo Radyo Legazpi, mas malilimitahan ang kanilang oras sa pangingisda kung patuloy na tataas ang presyo ng mga produktong petrolyo.
Aniya, posible na umabot na lamang sa P100 kada araw o mas mababa pa ang kanilang arawang kita dahil sa pagbawas ng oras at distansya ng paglalayag depende pa sa kung gaano karaming isda ang mahuhuli at sa bilang ng kanilang mga kasama.
Naniniwala siya na ang hakbang na fuel subsidy sa mga apektadong sektor ay hindi sasapat dahil mayroong 2.7 milyong rehistradong mangingisda sa bansa habang 300,000 lamang ang mabibigyan ng subsidy na maaaring mauwi sa selective approach sa mga magigin benepisyaryo.
Dahil dito, hindi isinasantabi ng opisyal ang posibilidad na ang ilan sa kanilang mga kapwa mangingisda ay mapipilitang huminto sa pangingisda na ikalulugod din ng mga kapitalista, lalo na ng mga importer ng isda.
Iminungkahi rin ng France na sa ganitong sitwasyon, mas makabubuting agad na alisin ang excise tax at value added tax sa mga produktong petrolyo upang malutas ang problema ng mga sektor na umaasa sa gasolina para sa kanilang kabuhayan.
