Nagbaba an nairehistro kan Department of Health (DOH) na kaso nin influenza-like illnesses (ILI) o mala-trangkasong helang sa enot na duwang semana kan Oktubre.
Segun ki Health Promotion Bureau Director Tina Marasigan, labi sa 6,400 kaso nin ILI an nairehistro sa bilog na nacion puon Setyembre 28 sagkod Oktubre 11.
Ini an 39% na mas hibaba kumpara sa 10,740 cases na nairehistro puon Setyembre 14 sagkod 27 kan presenteng taon.
An nasabng datos man an 25% na mas hibaba kumpara sa labing 8,600 na kaso nin helang sa parehong panahon kan 2024.
Alagad paliwanag kan opisyal na pwedesir man giraray magbago an nasabing numero huli sa nagpapadagos na surveillance.
Enot nang nilinaw ni Health Secretary Ted Herbosa na warang plano an ahensya na magpaotob nin lockdown huli sa paghalangkaw kan helang sa mga nakaaging semana partikularmente na sa mga estudyante na nagkawsa nin pagkanselar kan mga klase sa Metro Manila.
Segun sa kalihim an ILI an sarong seasonal respiratory illnesses kaya warang flu outbreak. Siring man na madali suboot na nagkalat an helang urog na pag panahon nin tag-uran kaya pigrerekomenda an pagsulot nin face mask o magtenir muna sa harong en kaso magkahelang nganing maibitarang makahawa.
Padagos na nagpapagiromdom an DOH sa publiko na regular na maghugas, takpan an ngimot asin dungo kun ma-atsing o maabo, asin dapat na may bastanteng turog, kumaon nin masustansiyang pagkaon asin mag-inom nin kadakol na tubig.
Para man sa mga may namamati nin mga sintomas siring kan kalintura, abo, pangungulog nin lalamunan asin hawak, dapat na magtenir sa harong nganing dae makahawa, mag-inom nin bulong siring kan paracetamol para sa kalintura asin magkonsulta sa doktor o pinakaharaning health center.
