LEGAZPI CITY- Pinakusog pa ngonian kan Department of Health (DOH) Bicol an mga programa tangarig na malabanan an helang na tigdas makalihis na magbadol an kabilugang kaso sa rehiyon sa labi 300.
Sa ekslusibong intrevista kan Bombo Radyo Legazpi ki Dr. Monrey Mancilla, DOH Bicol Family Coordinator for Immunization Program, sampulo na man an nairehistrong nagadan sa tigdas hale sa 316 na kaso susog sa latest data kun sain lima an hali sa Camarines Norte, apat sa Masbate asin saro sa Albay.
Napag-araman man na nasa 383% an isinakat kaini sa presenteng taon hali sa 65 kaso sana kaitong Nobyembre 2017.
Segun pa ki Mancilla, nairehistro an mga enot na kaso kan tigdas sa Albay alagad mas marikas suboot an pagtalubo kaini sa island province kan Masbate na nagbabadol na sa 140 cases.
Katakod kaini, inengganyar man ni Mancilla an mga magurang na pabakunahan an mga aki sa rural health units (RHUs) o kaya sa barangay health centers huli ta vaccine-preventable disease man an tigdas.
An tigdas o measles an helang na nakukua sa virus na Morbillivirus paramyxovirus na tipikal na nakakaolakit sa mga aki na edad anom na bulan hasta 12-anyos sa paagi kan paros na may dara kaini sa abo o paghatsing.
Nagkapirang aldaw man na nagkakaigwa nin pamamantal o rashes sa bilog na lawas asin mala-trangkasong pagmati na kun maglala an posibleng magresulta sa kagadanan.
