Naglalaom an kampo ni former President Rodrigo Roa Duterte na maresolberan kan Korte Suprema an mga petisyon manungod sa suboot iligal na pag-arestar sa dating presidente.
Sa ekslusibong intrevista kan Bombo Radyo ki Atty. Salvador Paolo Panelo Jr., pighiras kaini na piglalaoman na ano man na oras an madesisyon an Korte Suprema mapadapit sa kaso.
Susog man suboot ini sa dai pa sana nahahaloy na kahagadan nin ‘memorandum’ gikan sa mag-inibong na lado sa petisyon na isinangat kan mga aki ni Duterte.
Nagtutubod si Atty Panelo Jr. na an aksyon o orden na ini kan korte iyo na an pinal na parte kan proseso antes magpaluwas nin pinal na resolusyon.
An naunambitang abogado iyo an legal counsel ni Veronica ‘Kitty’ Duterte sa habeas corpus petition na isinangat ninda sa Korte Suprema.
Alagad, nanindugan an abogado na problema na suboot kan ehekutibo o gobyerno na ibalik sa nasyon si dating Presidente Duterte.
Ini enkasong paburan kan Korte Suprema an saindang habeas corpus petition asin isugo an mga respondents na ibalik asin ipresentar sa korte an dating presidente.
Sa ibong kaini, positibo an kampo ni Duterte na igwa pa nin mga paagi o lakdang na pwedesir gibuhon an gobyerno nganing maibalik sa nasyon an dating presidente.
Pwedesir man suboot na magpartisipar an gobyerno sa International Criminal Court asin idoon na pwedesir magkondusir nin sadiring paglilitis sa kaso.
Basado kaya sa Rome Statute kan International Tribunal, igwa sana ining hurisdiksyon kun an sarong estado dai kaya o habo magsagibo nin paglilitis o kasuhan an mga indibidwal na imbuelto sa sarong krimen.
Sa presente, nakabinbin pa an mga petisyon sa Korte Suprema, manungod sa pag-aresto asin pagpapadara ki dating Presidente Duterte sa The Hague, Netherlands.
