Sienerto kan Philippine Ports Authority (PPA) an kaligtasan kan mga pasaherong na-stranded sa mga pantalan sa tahaw kan mga kanselasyon kan mga biyahe kan mga passenger vessel.
Segun ki PPA Spokesperson Eunice Samonte, may mga nakabugtak na guwardiya an kada pantalan na magmamantenir sa kaayusan asin kaligtasan kan kada pasahero.
Regular man suboot na nagbabantay asin nagsasagibo nin inspeksyon an mga port police kaiba an mga miembro kan Philippine Coast Guard.
Segun pa ki Samonte na katakod kan pagmamantenir sa kaayusan an pagbabarewas man nin bastanteng pagkaon sa mga stranded na pasahero.
Naenot na man suboot na nagtagama an Department of Social Welfare and Development (DSWD) nin food packs nganing ibarewas sa mga pasahero.
Mientrastanto, dakol sa mga pantalan na enot na nakapagrehistro nin mga stranded na pasahero an gikan sa Visayas asin Mindanao—an mga rehiyon na nakaeksperyensya nin mga magagabat na pag-uuran dara kan habagat.
Magin sa Southern Luzon area siring kan Bicol Region asin MIMAROPA an pira man sa may mga na-stranded.
Segun pa ki Samonte magpapadagpos na bukas an kada terminal building nganing magtanggap sa mga pasaherong nagpalyar na makabalik o makauli mantang naghahalat sa resumption nin mga biyahe.
