LEGAZPI CITY- Pighihiling ngunyan kan Land Transportation Office (LTO) na an kakulangan ninda sa manpower an rason kun nata dakol man giraray na motorista an naiimbwelto sa mga violation.
Sigon ki Mar Majistrado, LTO Bicol chief, dae man sinda nagkulang sa pagpaabot nin impormasyon sa publiko dapit sa road safety asin mga penalidad na pwedesir na isangat in kaso magbalgar sa mga itinalaan na polisiya.
Dugang pa kaini, padagos an saindang pandadakop sa mga violators asin tambak an mga na-impound nindang mga behikulo.
Alagad ineksplikar ni Majistrado na an ibang motorista, ignorante sa mga patakaran kan ahensya kun sain wara sa kaaraman kan nagkapira sa mga ini na igwa na palan sindang violation.
Tinawan duon man kan opisyal na dae sindang pagkukulang alagad nagkukulang sana sa tawo kun kaya dakulang tabang an mga pulis na naka-deploy sa mga tinampo.
Patanid man kaini na haralangkaw na an penalidad ngunyan.
Halimbawa, an paso nang lisensya, P3000 an penalidad apwera pa sa pagsuspinder kaini nin sarong taon o dae pwedesir na magmanehar nin ano man na behikulo sa laog kan itinalaan na panahon.
Liwat na nagpagirumdom si Majistrado sa mga motorista na mag-sunod sa mga ipiglatag na polisiya kan LTO ngani na magin ligtas sa tinampo.
