LEGAZPI CITY- Pinaglalaoman na magigin dakulang tabang para sa mga obrero an inaprubaran na duwang tranche dagdag sweldo sa Bicol Region.
Hali kaya sa presente na P435 na minimum wage kan mga obrero sa rehiyon, magigin P455 ini sa Abril 8, 2026 asin pag-abot kan Disyembre 1 sa presenteng taon, nasa P480 na an minimum wage.
Segun ki Department of Labor and Employment (DOLE) Bicol Regional Director Imelda Gatinao sa intrevista kan Bombo Radyo Legazpi na nagkaigwa nin mahewasan na konsultasyon puo kan Enero 30 hasta Pebrero 24 sa gabos na mga provincia sa Bicol.
Nasundan ini kan deliberasyon kun dapat na magkaigwa nin paglangkaw sa sweldo kan mga minimum wage earners, urog pa na an Bicol an saro sa may pinakahibabang sweldo sa nacion.
Paliwanag kan opisyal na kaibanan sa mga ipigkonsiderar an kakayanan kan mga saradit na negosyo na magbayad nin dagdag pasahod, kasabay kan pangangaipo kan mga trabahante.
Napag-araman na kadaklan kaya sa mga establishimento sa rehiyon an mga saradit na negosyante, kaya pinagbanga sa duwang tranche an nasabing dagdag sahod ngani na dae man mabigla an mga ini.
