Mahigot an naging mensahe ni Israeli Prime Minister Benjamin Netanyahu kontra sa mga militanteng grupo na kalaban kan saindang nasyun.
Segun kay Netanyahu, nakahanda an saindang nasyun asin mga kaalyado na maglunsar pa nin mahiwasan na pag-atake en kasong magbalos an militanteng Hamas asin Hezbollah.
Ginibo ni Netanyahu an pahayag makalihis na magadan sa sarong airstrike an lider kan Hamas na si Ismail Haniyeh mantang nasa laog kan teritoryo kan Iran.
Nagadan man sa suway na airstrike an saro sa mga senior military commander kan Hezbollah na si Fuad Shukr.
Dae man kinumpirma ni Netanyahu kung sinda an nasa likod kan mga pag-atake alagad nanindugan ining handa sinda na depensaran an Israel.
Sa pagkagadan kan Hamas leader, dakula an posibilidad na masayang an pigbubusol na ceasefire para sa Gaza.
Naenot naman na inihayag ni Iranian supreme leader Ayatollah Ali Khamenei na obligado an saindang nasyun na magbalos huli ta nagadan an Hamas leader sa saindang teritoryo.
Maging an Hezbollah an naghuma man na mabalos sa pagkagadan kan saindang lider.
