LEGAZPI CITY- Dakula an kaugmahan kan pamayuhan kan Police Regional Office 5 huli sa historikal na pagdedeklarar sa provincia kan Catanduanes bilang insurgency free.
Segun ki Police Regional Office Bicol Director BGen. Andre Dizon sa intrevista kan Bombo Radyo Legazpi na katabang kan mga kapulisan an Armed Forces of the Philippines sa paglaban sa mga komunistang grupo.
Sa ibong kaini, sinierto kan opisyal na padagos man liwat an pagtatrabaho kan mga otoridad ngani na dae na malaog pa nin insurhensya an lugar.
Napag-araman na magtetenir na naka alerto an mga kapulisan asin mga suldados ngani na mamantenir an paz y orden sa island province.
Nagtutubod man si Dizon na an pagigin insurgent free kan Catanduanes an dakulang tabang sa preparasyon kan kapulisan para sa nagdadangadang na 2025 national asin local elections.
Sa presente kaya naka focus na man sa seguridad kan mga aspirants ngani na malayang makapangampanya an mga ini.
Mientras tanto, naglalaom man an opisyal na maabot an panahon na maidedeklarar man na insurgency free an bilog na rehiyon sa paagi kan tabang kan manlain lain na security forces.
