LEGAZPI CITY- Puga-puga na an isinasagibong inspeksyon kan Department of Tourism (DOT) Bicol sa mga beach resorts at isla sa rehiyon katakod kan obhetong mamantenir an kalinigan sa lugar kakabit kan pagtalubo pa kan turismo.
Sa intrevista kan Bombo Radyo Legazpi ki DOT Bicol Director Benjamin Santiago, pinunan na suboot an paglilibot sa anom na provincia kasabay kan pagtukaw sa pwesto kaitong Agosto kan nakaaging taon kaya duwang provincia na sana an dae pa nabibisita.
Aminado man an opisyal na igwang nagkapirang tourist sites sa Bicol na nahilingan nin pagbayolar katakod kan sanitation practices alagad inasegurar na pig-aaksyunan na kan nakakasakop na lokal na gobierno an problema.
Kaibanan sa mga ipigtatangro kan rehiyon an kapareho kan Boracay na white sand beaches mantang igwa man na pink sand beaches, cold and hot springs, water-related extreme sports, island hopping asin iba pang tourism adventures.
Magigirumduman na enot naman na inihayag ni Santiago na posibleng magin alternative kan Bora an Bicol kasunod kan 6-months temporary closure kan isla na nakatalaang punan sa Abril 26.
