LEGAZPI CITY—Ipighayag kan Masbate Bureau of Fire Protection na huminababa an insidente nin kasulo kan bulan na Marso kumapara kan nakaaging taon sa parehong peryodo sa provincia.
Segun ki Masbate Provincial Fire Station Provincial Chief PIO Fire Officer 2 Mike Tiden Migo, sa intrevista kan Bombo Radyo Legazpi, na an nasabing paghibaba nin insidente kan kasulo an resulta kan saindang esfuersos siring kan pagpapahigot nin mga inspeksyon sa mga establishamiento magin an pagtukdo sa mga namamanwaan mapadapit sa mga gigibohon en kaso man na may kasulo.
Sinabi man kan opisyal na sa ibong kan pagtatapos kan Fire Prevention Month an padagos man giraray sindang masagibo nin mga fire safety campaigns orog na ngonian na namamatean na an tag-init asin an paparaning semana santa ngani na maibitaran an kasulo o ano pa man na insidente.
Nagpagiromdom man ini sa mga residentes na apudan an mga haraning mga istasyon kan BFP kun kinakaipuhan ngani na maibitaran o malimitahan an ano man na kasulo sa saindang mga lugar.
