LEGAZPI CITY- Kwenistiyon ni Deputy Speaker Rodante Marcoleta an rason kan Senate Blue Ribbon Committtee sa padagos na pagsasagibo nin imbestigasyon manungod sa procurement kan gobyerno nin mga pandemic supplies hali sa Pharmally maski na wara man suboot nin nangyaring korapsyon.
Sa intrevista kan Bombo Radyo Legazpi kay Marcoleta, malinaw man na ipighayag kan Commission on Audit na wara nin nangyaring overpricing sa transaksyon mantang nakasunod man sana an pinarikas na procurement kan personal protective equipment (PPE), face mask asin face shield kan gobyerno sa probisyon kan Bayanihan.
Malinaw suboot na pamumulitika man sana an rason kan Senado sa piggigibong pagdangog lalo pang paparani na naman an eleksyon mantang pig-iimbwelto pa sa isyu an administrasyon.
Segun kay Marcoleta, nakalaag sa mandato kan Senate Blue Ribbon Committee na en kasong makahiling nin anomaliya o pagbayolar sa ley sa sarong isyu dapat na ipasa na ini sa Department of Justice, Ombudsman o National Bureu Of Investigation (NBI) na iyo an masagibo nin mas hirarom na imbestigasyon.
Alagad dae man suboot ini piggigibo kan Senado huli ta target an publicity o pagpapasikat sa publiko nganing makakua nin suporta para sa eleksyon.
Pangapudan kan Kongresiata sa Senado na parikason asin tapuson na an pagsasagibo nin hearing nganing magdalagan naman an imbestigasyon kan mga otoridad asin mas malinawan an isyu.
