LEGAZPI CITY-Itinakda kan Trial Chamber III kan International Criminal Court (ICC) an enot na status conference sa kaso ni dating Presidente Rodrigo Duterte sa Mayo 27, bilang parte kan pagpadagos kan paglilitis.
Segun sa ICC, ipigsugo an prosekusyon asin depensa na magsumiter kan saindang kanya-kanyang dokumento asin ebidensiya bago an deadline sa Mayo 15.
Kaiba digdi an trial briefs, disclosure kan mga materyales, asin iba pang importanteng detalye para sa kaso.
Obheto kan status conference na hilingon an timetable o iskedyul kan mismong paglilitis, pati na an mga masunod na lakdang sa proseso.
Naenot nang kinumpirma kan Pre-Trial Chamber I an 3 counts kan crimes against humanity laban kay Duterte, rason ngani mag-usad an kaso sa trial phase.
Sa lakdang na ini, mas pormal nang popoonan kan ICC an pagdangog sa kaso kan dating Presidente, na ngonian nasa kustodiya sa The Hague poon pa kan Marso 2025.
