LEGAZPI CITY – Pinapa-inhibit kan Pamilya Batocabe an hukom na presenteng nagkakapot kan kaso sa panggagadan ki Ako Bicol Party-list Representative Rodel Batocabe, kontra ki dating Daraga, Albay Mayor Carlwyn Baldo.
Isinumiter kan kampo kan mga Batocabe an Motion for Inhibition kasabay kan Motion for Reconsideration na obhetong mapugulan an napipintong paramientras na pagpapalibre ki Baldo kasunod kan pagpiyansa sa kasong Double Murder asin multiple attempted murder.
Pag-eksplikar ni Atty. Justin Batocabe, matuang aki kan lehislador sa intrevista kan Bombo Radyo Legazpi, duwang beses na suboot napagbigyan ni Presiding Judge Maria Theresa San Juan-Loquillano sa Legazpi City RTC Branch 10 an petition to bail ni Baldo sa mga kaso kaya mas marhay nang ibang hukom na sana an magdesisyon digdi.
Dugang pa ni Batocabe na pigpupugulan sana an ‘miscarriage’ sa kaso. Ikinamumundo man suboot kan pamilya an dalagan kan mga pangyayari urog na wara pa sa trial proper an kaso mantang aminadong nababantulan sa dalagan kan hustisya para sa ama.
Sa lado man kan mga Baldo, pighahalat kan mga ini an pormal na pagpirma ni Loquillano sa release order na on-leave kan magpiyansa nin labi sa P8 million sa nakalihis na semana an dating alkalde.
