LEGAZPI CITY—Arestado an sarong High-Value Individual sa ikinundusir na buy-bust operation kan mga otoridad sa Barangay Quezon, Baras, Catanduanes.
Segun ki Baras Municipal Police Station, Chief of Police, Police Captain Rhandy Rapesora, sa intrevista kan Bombo Radyo Legazpi, naarestar an suspek sa pinagsarong operatiba kan Regional Police Drug Enforcement Unit (RPDEU) 5, Catanduanes Provincial Intelligence Unit, Catanduanes 1st Provincial Mobile Force Company asin Baras MPS.
Binisto an suspek na sarong 42-anyos, sarong construction worker asin residente kan Barangay Buenavista kan nasambitang banwaan.
Nakumpiskar sa suspek an nasa tulong pakete nin heat-sealed transparent plastic sachet na may laog nin pigtutubudang shabu na may gabat na nasa haros 50 gramo, asin may kantidad na P340,000 (street price).
Afuera digdi, nakumpiskar man an marked money, sarong motor na kolor itom asin cellphone.
Dugang kan opisyal na dati na suboot na nakarsel an suspek huli sa pagkakaimbuelto sa ilegal na droga.
Sa presente, nasa kustodiya kan Baras MPS an suspek asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
