LEGAZPI CITY – Nasa kustodiya ngunyan kan Albay Police Provincial Office an hepe kan Legazpi PNP na si P/Supt. Nilo Berdin kaibanan an tulo pang pulis makalihis na makaresibe nin restriction order hali sa Camp Crame.
Sa eksklusibong intrevista kan Bombo Radyo Legazpi ki Albay PPO spokesperson PC/Insp. Arthur Gomez, ini an huli suboot sa alegasyong nabalgar kan saro sa mga nasasakupan kaining pulis an Anti-Torture Act makalihis na kulugan suboot an sarong inmate sa Legazpi CPS.
Napag-araman na nasa piskalya na an kaso kaini alagad pending pa an resolusyon.
Segun ki Gomez, wara pang durasyon kun pirang aldaw o pirang bulan ining matenir sa PPO alagad padagos suboot na imo-monitor kan kakatukaw pa sanang Regional Director kan PRO5 na si PC/Supt. Antonio Gardiola Jr.
Pigbuyagyag suboot kan pamilya kan nasambitan na preso na kinulugan ini kan sarong pulis alagad kan hagadan nin tabang an nakahiling na pulis, binayaan sana suboot ini kun kaya nadamay sa insidente.
Segun sa opisyal, kun malaog sa command responsibility, posibleng makasuhan an hepe nin administratibo asin bako criminal case huli ta bako man ini direktang imbwelto sa insidente.
Mientras tanto, sa ngonian igwa ng tulong pangaran na pinagpipilian na matukaw bilang officer -in-charge sa nasambitan na hepatura.
