LEGAZPI CITY-Nairehistro kan mga otoridad sa Cuba na buminagsak an saindang national electric grid poon kan Lunes na nagresulta sa mahiwasang blackout na nakaapektar sa haros 10 milyon na mga residente sa bilog na isla.
Nangyari an insidente sa tahaw kan matinding oil blockade na pigpapaotob kan Estados Unidos na nagpalala sa generation system kan nacion.
An eksaktong kawsa kan pagbagsak kan grid padagos pang pig-iimbestigaran, makalihis an serye nin darakulang power outage sa na naghaloy sa pirang aldaw.
Susog sa gobierno kan Cuba na na dai ninda pigbabasol an pagkaraot kan pinakadakulang na planta nin kuryente, kundi problema ini sa transmisyon.
Napag-araman man na an oil blockade kan Estados Unidos an nagresulta sa pagsuspinde kan fuel imports sa laog nin nagkapirang bulan sa nacion makalihis na makulong si Venezuelan President Nicolás Maduro, na saro sa mga nagsusuporta sa Cuba ngani magpadara nin suplay kan langis.
Sa presente, nagsasarig an Cuba sa Mexico asin Jamaica, na naghahatod nin limitadong suplay nin langis ngonian na taon.
Mientrastanto, kadakol na mga Cuban an nahahadit sa halawig na epekto kan krisis, huli ta an nasyon regular na nakakaeksperyensya nin mga blackout.
Nairehistro man na dakul sainda an naghahanap nin alternatibong paagi ngani mapadalagan an saindang mga negosyo, ospital, asin serbisyo na apektado kan paglakop kan blackout.
Huli digdi, napapaatubang an Cuba napapaatubang sa matinding krisis sa enerhiya na nagpalala sa kakulangan nin kuryente, tubig, asin iba pang serbisyo publiko sa nacion.
