LEGAZPI CITY-Kadikit an nanotarang danyos kan banwaan kan Guinobatan sa Albay kasunod kan panrarapado ni Bagyong Opong.
Segun kay Guinobatan Mayor Ann Gemma Onjoco, sa intrevista kan Bombo Radyo Legazpi, na mantang pighahalat pa an pinal na report, kadikit an danyos sa saindang agrikultura.
Dagdag pa niya na sa herak nin Diyos na wara man nin pagbabaha orog na sa parte kan Masarawag asin nagin milagro man suboot na warang pagbaba nin lahar flow hale sa Bulkang Mayon.
Nagkaigwa man suboot nin pre-emptive evacuation orog na sa mga “at risks na area” asin tulos na pina-ebakwar.
Dugang pa ni Mayor Onjoco na tulos man na nakipag-kooperar an mga residente sa pag-ebakwar huli sa well-informed man sinda kan mga sitwasyon asin nasasabutan man ninda an importansya kaini.
Sa presente, may mga kaipuhan maayos na linya sa nagkapirang barangay asin dai man suboot nagpapabaya an power provider sa pag-restore kan mga linya sa gabos na mga barangay sa nasabing banwaan.
Nakapagtao man suboot nin mga relief goods an mga lokal government unit asin nasa 8,000 na mga pamilya an nakapag-ebakwar sa saindang evacuation center.
Pigpapasalamatan man kan opisyal an mga nakipagkooperar na mga opisyales kan mga barangay.
Mensahe man kan opisyal sa mga taga-guinobatan na liwat igwa na naman na laoman na bagyo sa maabot na oktubre, an mag-ingat asin preparado an saindang local government unit para magtao nin tabang asin laoman na ma-spare nin mga pagbagyo an provincia kan Albay.
