LEGAZPI CITY- Kinondena kan grupo nin mga parasisira an panibagong propaganda kan China katakod kan ipinaluwas na AI-animated video kan sarong state-controlled media outlet na nagpapahiling kan pagkukumparar sa mga Pilipino sa unggoy.
Sa nasabing video, mahihiling an sarong unggoy na nakasulog nin salakot asin Barong Tagalog asin binomba pa nin water canon mantang kapot an papel dapit sa 2016 arbitral ruling.
Segun ki Pamalakaya President Pando Hicap sa intrevista kan Bombo Radyo Legazpi na pambu-bully asin pambabastos na ini sa gabos na mga Pilipino.
Paliwanag kan grupo na mawot kan China na baguhon an istorya sa West Philippine Sea.
Sinabi kan opisyal na an 2016 Arbitral Ruling an patunay na dae pigbibisto an nine-dash claim kan China sa nasabing teritoryo.
Binasol pa kan grupo sa paglala kan sitwasyon an suboot padagos na paglaom kan administrasyon sa Estados Unidos, na nagkakawsa pa nin dugang na tensyon.
Mientras tanto, nanindugan si Hicap na dapat magsunod an China sa international law urog pang parte ini kan United Nations Convention on the Law of the Sea (UNCLOS).
