LEGAZPI CITY- Nagpaluwas nin mga suhestyon an grupo nin mga paratukdo sa karapat dapat na paggamitan nin pondo imbes na tutukan an libro na isinurat ni Vice President Sara Duterte na may titulong ‘Isang Kaibigan.’
Segun ki Teachers Dignity Coalition Chairman Benjo Basas sa intrevista kan Bombo Radyo Legazpi na maikokunsiderar na generic ang laog kan libro.
Mawot sanang matawan linaw kan grupo kun karapat-dapat bang pondohan nin P10 million an nasabing children’s book.
Dakol na suboot na mga programa an mapanggagamitan kan nasabing dakulang pondo.
Suhestyon ni Basas na gamiton na sana an pondo ngani na maghanap nin matitibay na reading teachers asin writers na isasairarom sa training ngani na mas matutukan an tunay na pangangaipo kan mga estudyante.
Dakol suboot an mga indipendent writers na dae nakakapag sapublikar nin libro huli sa kawaran nin pondo.
Sa siring na paagi, mas mabaskog pa suboot an publishing industry na makakatabang pa sa ekonomiya kun mapopondohan nin matanos.
Dugang pa ni Basas na kun talagang mawot na itukdo an kabutihang asal asin mga pag-uugali, magayon na investment an P10 million para sa produksyon kan mga materyales na magagamit kan mga kaakian.
