LEGAZPI CITY – Nagpahayag nin pagkadismaya an mga grupo nin mga paratukdo mapadapit sa pag-aksyon kan presenteng administrasyon sa mga nagin katiwalian ni Vice President Sara Duterte kan kalihim pa ini kan Department of Education.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na imbes na marikas na pag-olayan an nagin korapsyon kan bise kan education secretary pa ini, mas nahihiling pa lugod na garing takot an administrasyon na bawian kan mga pro-duterte na nasa posisyon.
Ipahiling dapat kan administrasyon an kamay na bakal kaini sa mga tiwaling mga opisyal asin wara dapat makalusot nganing matawan nin hustisya an buwis kan taumbayan.
Dae man magkakaigwa nin magayon na epekto kun papalitan niya nin pirang beses an saiyang mga gabinete kun pigpapa-otob man liwat an dating mga polisiya na nagpapadifisil sa mga paratukdo asin estudyante.
Pigtaram pa kan opisyal na milyon-milyong kantidad an pig-oolayan digdi kun kaya dapat na madagit an taumbayan huli ta bako na mahalaga kun siisay an pigsusuportarang politiko.
Pig-agyat man ni Quetua an gobierno asin an Deped na maglibot sa mga eskwelahan sa mga nagkapirang parte kan nacion nganing mahiling ninda kun ano an epekto an kakulangan nin paratukdo asin classroom.
Mientrastanto, padagos man an saindang pagguno nin datos sa mga paratukdo sa mga lugar na may aktibong kaso kan mpox.
