LEGAZPI CITY – Nangangapuan an grupo nin mga parasira sa gobyerno na mapanimbag an kumpanya na may kagsadiri kan oil tanker na naglubog asin nagkawsa nin oil spill sa Bataan.
Sa intrevista kan Bombo Radyo Legazpi kay Fernando Hicap an Presidente kan Pambansang Lakas ng Kilusang Mamamalakaya ng Pilipinas, makadismaya na huli sa kapabayaan kan sarong kompanya, rinibong mga parasira asin saindang mga pamilya an nagsasakit sa ngunyan.
Kinuwestyon man kan grupo kung papanong nakapagbiyahe man giraray an tanker na may kargang 1.4 milyon liters nin produktong petrolyo maski pa may raot na nin panahon dara kan Habagat asin Bagyong Carina.
Huli digdi, dapat sana suboot na mapanimbag sa ley an mga may kagsadiri kan oil tanker siring man an mga ahensya kan gobyerno na nagkaigwa nin kapabayaan.
Agyat pa ni Hicap kay Presidente Ferdinand Bongbong Marcos Jr. na tutokan an isyu ngani na mahagadan nin kompensasyon an kompanya sa winalat kaining danyos.
Magigirumduman na enot naman na sinabi ni Justice Secretary Jesus Crispin Remulla na pig-iimbestigaran na ninda an mga report na posibleng imbwelto an naglubog na tanker sa iligal na kalakaran nin “paihi.”
Ini an sistema kung sain ipiglilipat kan dakulang barko an kargang produktong petrolyo sa mas sadit na sakayang pandagat ngani na makalikay sa pagbabayad nin buwis sa gobyerno.
