LEGAZPI CITY- Aminado an grupo nin mga paraoma na mababawasan nin diit an pagkalugi kan National Food Authority alagad dae man liwat makakabawi sa gastos sa saindang operasyon.
Ini makalihis na aprubaran kan National Food Authority na langkawan nin P13 an presyo kan pigpapabakal na bagas kan ahensya.
Segun ki Federation of Free Farmers National Manager Raul Montemayor sa intrevista kan Bombo Radyo Legazpi, maski pa langkawan an presyo kan pagpapabakal nin bagas kan ahensya, lugi man liwat ini huli ta pigbabakal an paroy nali sa mga paraoma nin nasa P28 hasta P30 kada kilo.
Basado sa kalkulasyon kan grupo nasa P50 per kilo an kantidad na kinakaipuhan ngani na makabawi an ahensya hali sa pagkalugi.
Kumpiyansa man si Montemayor na warang dakulang epekto an nasabing lakdang kan ahensya sa mga lokal na paraoma huli ta komon sana na naipapabakal an NFA rice sa mga Kadiwa stores.
Aminado an opisyal na magayon an kamawotan kan gobierno na makapagpabakal nin baratong bagas alagad dae suboot kaini naitatago an reyalidad na bilyun-bilyon an nalulugi sa nasabing ahensya.
Ini an huli sa pagbakal nin paroy sa halangkaw na presyo alagad ipigpapabakal nin barato.
