LEGAZPI CITY—Pigdoon kan sarong grupo nin kababaihan na warang maraot sa gawi nin pighahapot ni House prosecutor asin San Juan Rep. Bel Zamora durante kan ika-30 aldaw kan impeachment trial ni Vice President Sara Duterte.
Ini kasunod kan naresibeng misogynistic na mga komento online kan nasabing opisyal mapadapit sa saiyang pagtataram.
Segun ki Bicolana Gabriela Spokesperson Jen Nagrampa, sa intrevista kan Bombo Radyo Legazpi, na trabaho niya ini bilang sarong abogado asin representative kan Kongreso na maghapot mapadapit sa impeachment.
Sa siring na sitwasyon nagigin mapanghusga suboot an mga namamanwaan kun pano pig-deliver an mga kahaputan asin bako an substance kan saiyang pigtataram.
Dugang niya na posible suboot na style ni Zamora ini nganing simbagon an saiyang kahaputan kan testigong si Police Major Joericson Sangalang.
Mientrastanto, nangapudan si Nagrampa sa namamanwaan na dae ipa-normalize an mga siring na komento pagtuyaw sa mga kababaihan na vocal sa siring na isyu.
Siring man na digdi nahihiling suboot an pagigin insecure kan kalalakihan na igwang mga kababaihan na kayang manindugan o magtaram urog na siring na sitwasyon.
Mensahe man niya sa kababahaihan na pag-adalan an orolay sa pagrespeto kan lambang saro, asin paghiling sa substance kan pigtaram bako sa kun pano ini magtaram.
