Sarong Grade 9 student an nadakupan nin pinagtutubudan na shabu na nagkakantidad nin P200,000 sa laog nin sarong eskwelagan sa Bacolod City kan Martes.
Segun sa kapulisan na nagsasagibo nin inspeksyon an school security guard sa bag kan estudyante kan makaresibe sinda nin impormasyon na may dara ining patarom.
Sa ginibong inspeksyon, nadiskubre an pinagtutubudan na iligal na droga sa laog kan saiyang bag.
Tulos man na isinairarom sa pangangataman kan Bacolod City Social Development Center an menor de edad mantang nagpapadagos an imbestigasyon.
Maduon man na pinahimutikan kan ina kan estudyante na imbwelto an saiyang aki sa iligal na droga.
Segun sa mga kapulisan na dae man pighahali an anggulo na posibleng biktima nin prank an estudyante.
Sa presente pig-aaram pa kan mga otoridad kun papano nakalaog sa eskwelahan an pinagtutubudan na shabu asin kun siisay an posibleng may paninimbagan sa insidente.
