LEGAZPI CITY—Panibagong gabat sa bulsa an kakahampangon kan namamanwaan urog na sa hanay kan transportasyon an liwat na paglangkaw kan presyo nin petrolyo na ipapaotob sa Martes, Hulyo 20.
Segun ki Condor Piston President Ramon Rescovilla, sa intrevista kan Bombo Radyo Legazpi, na kun magsakat giraray sa P10 an presyo kan diesel an posibleng magbalik ini sa dating labi P91 o lagpas pa an presyo kan kada litro kaini sa ibang gasolinahan kaya dakula man an mawawarang ganansya sa mga driver.
Sa ngunyan medyo maray pa an nakukuang ganansya na nasa lagpas P500 alagad huli kan panibagong taas-presyo an mapapasiring sana ini sa krudong pigkakarga sa maghapon asin dakula an mawawara sa saindang ganansya.
Katakod kaini, padagos man an pangapudan kan grupo na ibasura an oil deregulation law, pasuspendir sa Expanded Value-Added Tax (EVAT) asin excise tax sa langis.
Punto kaini na kun hahalion an nasabing buwis bako sana driver an makikinabang kundi an mga commuters magin an posibleng pagbaba sa presyo kan mga pangenot na barakalon.
Dugang ni Rescovilla na magkakaigwa man sinda nin mga pag-oolay asin pag-aadalan kun lalangkawan an presyo kan pamasahe sa pampublikong transportasyon huli sa posibleng pagtaas kan presyo nin petrolyo. VC_Condor Piston President Ramon Rescovilla
