LEGAZPI CITY – Labing pasasalamat kan Gabriela Bicol sa mga eskwelahan na nagsuspendi kan saindang klase bilang pagkomemorar kan ika-39 taong anibersaryo kan EDSA People Power Revolution.


Magigirumduman kaya na kan Oktubre 2024 kan iniluwas kan MalacaƱang an listahan kan mga holiday sa nacion ngonian na 2025 kun saen dae ninda idineklarang special non working holiday an Pebrero 25.


Segun ki Gabriela Bicol Spokesperson Jen Nagrampa sa intrevista kan Bombo Radyo Legazpi na nagpapasalamat sinda sa mga eskwelahan nin huli ta nakisumaro sinda sa pagrumdom kan People Power sa siring kaan na paagi.


Importante suboot an siring kaining pagrumdom ngonian na talamak an korapsyon sa gobierno.


Pigdugang niya man na isabuhay an diwa kan people power asin baguhon an bulok na sistema sa nacion.


Mientrastanto, nauugma an saindang grupo nin huli ta kadakol an nakisumaro sa saindang aktibidad na gikan pa sa manlain-laing sektor nganing maipagirumdom an saindang kamawotan na pagbabago.


Mawot man kan saindang grupo na ipadagos an pagpapanimbag kan mga pulitiko na may piggigibong katiwalian.


Nagpasalamat si Nagrampa sa gabos na nagpartisipar sa saindang aktibidad nin huli ta dae pigmati kan mga ini an init kan panahon nganing mai-paabot sana sa mga nakatukaw sa pwesto an saindang pangapodan asin agrangay.