Padagos an pagbulos nin pagbati kay dating Pinoy boxing champion Manny Pacquiao makalihis na mailehir bilang Hall of Famer class of 2025.
Nangenot sa nagtao nin pugay an long-time trainer asin coach kaini na si Freddie Roach.
Sinabi kaini na labi an saiyang kaogmahan huli sa pagkakalaog kan pangaran ni Pacquiao sa International Boxing Hall of Fame.
Istorya pa kan beteranong boxing coach, na kan 2001 kan buksan niya an saiyang Wild Card Boxing Club an naglalaom ining igwang masunod sa yapak ni Muhammad Ali.
Dae ini nabigo kan maglaog sa saiyang training camp si Pacquiao.
Sa laog kan 20 taon na kapot si Pacquiao an nasubaybayan kaini an matrayumpo na boxing career kaini lalo na sa mga pagkulektar niya nin mga manlaen- laen na boxing belt.
Apwera kay Roach an may nagkapirang kapwa Pinoy boxers asin mga atleta an nagbati sa dating senador.
Magigirumduman na pinasalamatan ni Pacquiao an pagkakapili sa saiya huli sa dae nalingawan an mga pagpursige kaini para maging matrayumpo na boksingero.
