LEGAZPI CITY—Katakod kan pagselebrar kan Chinese New Year ngunyan na aldaw, pigheras kan sarong fortune teller an nagkapirang tips para sa masaganang taon ngunyan na 2026.
Segun ki Madam Babes sarong fortune teller sa intrevista kan Bombo Radyo Legazpi, na an Chinese New Year an kapareho man kan pagselebrar nin Bagong Taon.
Sinabi kaini na an pagtao nin pagkaon na Tikoy asin pagbugtak nin kwarta sa ampao an sarong pampaswerte huli sa kun ano man an pigtatao sa iba, an ibabalik man ini satuya.
En kaso man na minalas kan nakalihis na taon, abiso man niya na magbakal nin tsinelas na kolor pula asin ini an gagamiton bilang pangharong sa pang-uro aldaw nganing makaapak pirmi sa swerte.
Kabale man sa pwedesir na ihandang pagkaon an prutas na orange asin mansanas, huli sa an orange an para sa prosperity na iyo an piggamit kan mga Chinese national sa gari pag-ofresir ki Buddha na nagdadara nin grasya.
Dugang pa niya na epektibo man an pagsagibo nin dragon dance asin pagbugtak nin ampao na may laog na kwarta urog na sa mga establishimiento na bako magayon an ganansya o matumal an negosyo huli sa nakakawara ini nin malas.
Mientrastanto, tinawan-doon man ni Madam Babes na maski ano pa man an pampaswerte an gibohon alagad kun dae man mahiro asin dae mahigos o makakalingaw sa Diyos an wara man liwat na swerte an maabot sa sarong tawo.
