LEGAZPI CITY – Inapod na duwag asin peke ni Former ACT Teachers party-list Representative France Castro si Senator Ronald “Bato” dela Rosa huli sa pag-absent kaini sa session na madepensa kuta sa propwestong 2026 budget kan mga pangenot na security agencies sa nacion.
Magigirumduman na dae na nag-atendir sa mga sesyon an nasambitang senador poon kan ibuyagyag ni Ombudsman Jesus Remulla na igwa ining kapot na digital copy kan warrant of arrest ni Dela Rosa na gikan sa International Criminal Court (ICC).
Segun ki Castro sa intrevista kan Bombo Radyo Legazpi na dapat maggibo na nin lakdang si Senate President Vicente “Tito” Sotto III mapadapit sa pag-absent ni dela Rosa sa mga session.
Punto pa niya na kun talagang maisog suboot si Senator Bato an dapat hampangon niya an akusasyon huli ta ipigpapahiling sana kaini na guilty siya sa mga nangyaring panggagadan kan Duterte Administration.
Pigtaram pa kan opisyal na bako totoo an naenot na pahayag ni dela Rosa na kaya niyang ibahan si former President Duterte sa detention facility kan ICC.
Suhestyon niya pa na tanggalon na an sweldo kan nasambitang senador kun nagtatago na man sana ini asin dae na piggagampanan an saiyang trabaho na magserbi sa namamanwaan.
Pagdoon pa ni Castro na mamatean man ngonian kan co-perpetrator kan dating presidente an mga namatean mang takot kan mga biktima kan war on drugs.
