LEGAZPI CITY – Binanatan kan dating kongresista an nagin pahayag ni former Libon Mayor asin presenteng Albay Board Member Das Maronilla na dae niya aram an mga ipigpatugdok na mga flood control projects sa saindang lugar.
Segun ki Former Albay 3rd District Representative Didi Cabredo sa intrevista kan Bombo Radyo Legazpi na pigpapahiling kan dating alkalde na nagkaigwa nin mga ghost flood control projects sa nasabing banwaan.
Pagdoon niya man na aram ni Maronilla na igwang ginibo na mga proyekto partikular na sa mga pigkokonsiderang floode prone barangay kan saindang banwaan na nagkawsa nin dakulang tabang sa mga residentes asin paraooma.
Pighihiling niya man bilang welcome development an wala-toong imbestigasyon kan National Government mapadapit sa flood control nganing maaraman kun sain napaduman an pondo, kun natapos, asin kun tama an pagkakagibo kan mga proyekto.
Pigtaram pa kan opisyal na maski siya an nangapodan sa gobierno dati na bantayan an pigpapatrabaho kan gobierno, mapa-flood control man o maski tinampo asin tulos na magsumbong nganing matawan tulos ini nin magkakanigong aksyon.
Paglinaw niya man na bako gabos na mga proyekto sa terser distrito kan Albay an request niya kundi may mga proponent an ibang pulitiko asin ibang partylist sa ipigpapatugdok sa saindang lugar.
Paghistorya pa ni Cabredo na may mga ipinapundo siyang proyekto sa saiyang termino huli ta nanotaran nindang substandard an mga materyales asin maluya an pagkakagibo kaini na hale man sa sumbong kan mga magigin resipyente kan mga proyekto.
