LEGAZPI CITY-Uminabot na sa tulong katawo an kumpirmadong gadan sa pagguho kan sarong edificio sa Angeles City, Pampanga.
Napag-araman na maabot sa 47 katawo an naireport na apektado, 26 an nasalbar, mantang 17 pa an pighahanap pa kan mga responders.
Segun sa Philippine Red Cross (PRC), nakikipagtabangan sinda sa mga lokal na awtoridad ngani na masalbar an mga natatadang biktima sa nasabing edificio.
Nagpadara na sinda nin Collapsed Structure Search and Rescue (CSSR) asin Emergency Medical Services (EMS) teams hale sa Pampanga asin Olongapo Chapters ngani magtabang sa lugar kan insidente.
Bilang kasimbagan sa pangangaipo kan pamilya kan mga biktima, nagsagibo an Philippine Red Cross nin 24/7 Welfare Desk sa Angeles Hospital for Restoring Family Links (RFL) asin psychosocial support.
Nagtetenir na naka-alerto an mga staff asin volunteers kan Philippine Red Cross nganing masierto an marikas na paghatod nin tabang.
Padagos an pangapudan kan organisasyon na ipagpangadyi an mga biktima, saindang mga pamilya, asin an mga nagresponde sa trahedya.
