Ipinaluwas kan Philippine Statistics Authority (PSA) an pinakabagong datos hali sa 2025 National Demographic and Health Survey (NDHS) na nagpapahiling kan padagos na pagbaba kan fertility rate kan kababaihang Pilipino sa 1.7 na aki kada babayi.
Ini na an pinakahibabang antas sa historya.
Hali sa 4.1 na aki kada babayi kan 1993, padagos an pagbaba kan fertility rate sa nakalihis na dekada.
Sa presente mas hibaba ini sa replacement level na 2.1 na kinakaipuhan ngani na mamantenir an presenteng populasyon.
Segun sa survey kan ahensya na nagbaba an fertility rate sa parehong urban asin rural na lugar, kun sain an mga kababaihan sa mga ciudad an igwang average na 1.5 na aki, mantang an mga nasa rural na komunidad an igwang 2.0 na aki.
Pinakahalangkaw an fertility rate sa Bangsamoro Autonomous Region in Muslim Mindanao na 2.4 na aki kada babayi, na pigsusundan kan Region IV-A (1.3), National Capital Region, asin Negros Island Region (1.4).
Nahiling man sa survey na mas hudyan ngunyan sa prayoridad kan mga kababaihan an pagkakaigwa nin aki.
Pinaka komon na pangangaki sa edad na 25-anyos hasta 29-anyos, mantang nagtetenir na hibaba an adolescent fertility sa 22 na pangangaki kada 1,000 na kababaihan na may edad 15-anyos hasta 19-anyos.
Nagbaba man an teenage pregnancy na igwang 4.9% kan mga aking babayi na nasa 15-anyos hasta 19-anyos na naka eksperyensya na nin pagbabados.
Nagluwas man sa survey na mas dakol na kababaihang Pilipino an pigpipili na magkaigwa nin diit na aki.
Segun sa datos, 57.3% kan mga may agom na babayi an nagtaram na habo na nindang dugangan an aki, mantang 13.4% sana an mawot nin saro pang aki sa masunod na duwang taon.
Naglangkaw man an nagagamit nin modern contraceptives sa mga may agom na babayi na 44.5%.
