LEGAZPI CITY- Tinuyaw kan grupong Bantay Bigas an pagpapaotob ni Presidente Rodrigo Duterte nin Executive Order 135 na nagpapababa sa taripa kan mga imported na bagas.
Sa irarom kan deklarasyon gabos na taripa sa mga imported na bagas na hali sa Most Favored Nation (MFN) an ibababa sa 35% hali sa dating 40% sa in-qouta mantang 50 para sa out-qouta.
Sa intrevista kan Bombo Radyo Legazpi kay Cathy Estavillo an tagapagtaram kan Bantay Bigas, pinakanaapektaran kan deklarasyon an mga lokal na paraoma na dae na kayang makipagkompetensya sa dakol kan mga imported na bagas na naglalaog sa nasyun.
Imbes kaya na magbakal an mga traders hali sa mga Filipinong paraoma mas pigpipili na sana na mag-import sa ibang nasyun sa mas baratong presyo lalo pang binabaan na naman an taripa.
Patotoo sana suboot ining palpak an naenot ng ipinaotob na Rice Tarrification law na dapat kuta ng magpadakol asin magpababa sa presyo kan bagas sa merkado.
Pinagkakarkulo man kan grupo na nasa P90 bilyon na an nawarang delihensya sa mgalokal na paraoma sa duwang taon na pagpapaotob kan ley.
Huli digdi pangapudan kan grupo na mas tawanan nin suporta asin atensyon an mga lokal na paraoma ngani na dae na kaipohanon pang mag-import kan nasyun asin mas makusog an satong ekonomiya.
