Isinunad an enot na impeachment complaint laban ki Presidente Ferdinand Marcos Jr. sa Kamara de Representantes huli sa suboot saiyang pagkaimbwelto sa 2025 corruption scheme na may kinaaraman sa unprogrammed appropriations, asin iba pang isyu.
Isinumite ni Atty. Andre de Jesus an reklamo ngonian na aga sa opisina ni House Secretary General Cheloy Garafil.
Inendorso an reklamo ni Deputy Minority Leader asin Pusong Pinoy party-list na si Rep. Jernie Nisay.
Sa saiyang reklamo, sinambit ni De Jesus an minasunod na mga basehan:
Pagsugo kan pagdukot asin pagsuko ki dating Presidente Rodrigo Duterte sa International Criminal Court.
Inakusaran niya si Marcos na drug addict, na soboot nakaapektar sa judgement asin liderato kan presidente.
Dai suboot ini naka-veto kan mga unprogrammed appropriations asin iba pang unconstitutional provisions sa mga General Appropriations Acts para sa 2023, 2024, 2025, asin 2026.
Nakinabang suboot sa mga kickback sa mga budget insertion asin ghost flood control projects.
Suboot pagtahob sa mga kurakot na kaalyado kaini sa paagi kan pagmukna kan Independent Commission for Infrastructure (ICI).
Suboot pagbalgar sa Konstitusyon asin pagtataksil sa tiwala kan publiko huli sa pagsuko ki Duterte sa ICC.
Sa ICI, sinabi ni De Jesus na an lupon na nag-iimbestigar kan flood control controversy ginamit bilang kasangkapan sa pag-target kan saindang mga kalaban sa pulitika.
Dugang pa ni De Jesus, an pagsayuma ni Marcos na direktang simbagon an mga alegasyon nin paggamit nin iligal na droga pwedesir gamiton laban saiya.
Segun saiya, dae man nag-agi nin anuman na testing o proseso si Marcos nganing patunayan na sala an alegasyon na siya an adik sa o naggagamit nin iligal na droga.
Magigirumduman na kan nakaaging Nobyembre, durante kan sarong rally kan sarong relihiyosong grupo, sinabi ni Senador Imee Marcos na naggagamit nin iligal na droga an saiyang tugang na si Presidente Marcos.
