LEGAZPI CITY-Pigpupursige ni House Minority Leader asin 4Ps Party-list Representative Marcelino Libanan an pagtatao nin special emergency powers kay President Ferdinand “Bongbong” Marcos Jr. ngani mapakaskas an implementasyon kan national flood control program, sa tahaw kan padagos na problema sa pagbaha sa manlain-lain na parte kan nacion.
Segun kay Libanan, an emergency powers an magtatao nin dalan ngani malampasan an mga bureaucratic delays asin mga nakakaulang sa epektibong pagpapaotob kan mga proyekto sa flood control.
Kairiba sa lakdang an pagbakal nin flood control equipment, pagkuwa kan right-of-way para sa mga proyekto asin relokasyon kan mga pamilyang apektado kan mga proyekto.
Dagdag pa ni Libanan, nanagngapudan siya sa Presidente na mag-convene kan sarong National Public-Private Flood Control Summit ngani pagsaruon anmga eksperto, teknolohiya, asin resources para sa pagbilog kan sarong Presidential Task Force on Flood Control.
Nakatalaga an emergency powers sa Article 6 Section 23 kan 1987 Philippine Constitution kung sain posibleng magtao an Kongreso kan Presidente nin lakdang sa panahon kan gera o emherhensiya sa nacion alagad dapat aprubahan kan Kongreso sa paagi kan ley na malinaw na igwang limitasyon asin pwedisir bawion sa anumang oras an sarong resolusyon.
Magigirumduman na kadakol na proyekto an napundo huli sa komplikasyon sa procurement, legal disputes, asin kakulangan sa koordinasyon kan mga ahensya.
Sinabi man ni Libanan, na dapat nang maghiro an gobierno ngani linigon an mga ilegal na istruktura sa mga daluyan nin tubig, ipaotob an zoning laws asin protekahan an mga critical waterways.
