LEGAZPI CITY- Sinabi kan sarong election watchdog na bako transparent an Commission on Elections (Comelec) sa motu proprio investigation sa statement of contributions and expenditures (SOCE) ni Senator Rodante Marcoleta.
Ini makalihis na ihayag ni Comelec Chairman George Garcia na ipapaluwas na sa aga, Marso 18 an desisyon kan nasabing imbestigasyon.
Segun ki Kontra Daya Convenor Danilo Arao sa intrevista kan Bombo Radyo Legazpi na warang full text kan grounds kan imbestigasyon an komisyon.
Bako man suboot malinaw an mga parametro kan Comelec sa ginibo kaining imbestigasyon.
Marurumduman na nag-ugat an reklamo kan akuon ni Senator Marcoleta na nagresibe siya nin donasyon para sa saiyang kampanya sa pagka-senador alagad dae ini ipigdeklarar sa saindang statement of contributions and expenditures (SOCE).
Tinawan duon ni Arao na kinakaipuhan na magkaigwa nin transparency sa eleksyon ngani na dae pangarugan kan ibang mga kandidato.
Paliwanag kan opisyal na importante an pagdeklarar kan mga donasyon antes an kampanya asin durante an kampanya kan sarong kandidato.
Marurumduman na an Kontra Daya an igwa man nin suway na reklamo na ipigsunad sa Commission on Elections asin Ombudsman katakod kan nasabing bayolasyon kan senador.
