LEGAZPI CITY – Igwang naobserbaran na diit na pagbabago an Ecowaste Coalition sa mga sementeryo durante kan Undas ngonian na taon, alagad mayorya pa man giraray an daing sistema pag-abot sa tamang pag-segregate kan basura.
Segun ki Zero Waste Campaigner na si Ochie Tolentino, sa intrevista kan Bombo Radyo Legazpi, igwa nang mga sementeryo na nagin mas organisado asin malinig kumpara kan nakaaging taon, kun sain igwa nang Material Recovery Facility (MRF), igwang mga waste bins na may label, asin igwang mga basura patroller na naglilinig sa bilog na area.
Alagad, segun ki Tolentino, dae ini nangangahulugan na igwa nang sistema huli ta maski nagsisigid an mga tawohan, pinagsasaro man giraray an gabos na basura, na kabaliktaran kan boot sabihon kan RA 9003 o Ecological Solid Waste Management Act.
Paliwanag niya, an RA 9003 dapat ipatupad bakong sa panahon sana nin Undas kundi sa bilog na taon, na igwa nin segregation, recycling, asin composting.
Huli kaini, nangapodan an Ecowaste Coalition sa mga LGU, barangay, asin mga administrador kan pribado asin pampublikong sementeryo na ipatupad nin husto an ley.
Sa ngunian, padagos pa man an pangapodan kan grupo na baguhon an nakaugaliang sala na pagtapok nin basura tanganing mapangatamanan an kalinigan, kasalbadohan, asin kasagraduhan kan selebrasyon kan Undas.
