LEGAZPI CITY-Nangapudan an Environmental group na BAN Toxics para sa mas mahigot na pagpapaotob kan Republic Act 9003 o Ecological Solid Waste Management Act, katakod kan pagluwas kan mga basura hale sa Manila Bay pasiring sa mga agihan nin tubig sa Parañaque City.
Segun sa grupo, an insidente nagtampok kan problema sa bakong tamang pag-tapok kan basura, kawaran nin imprastraktura sa pagmanehar kan basura, asin hababang kaaraman kan publiko manungod sa tamang pag-tatapok kaini.
Basado sa Compendium of Philippine Environmental Statistics 2025, an nacion igwa sana nin 20,458 na mga recovery facilities, kun ikukumpara sa labing 42,000 na mga barangay.
Pigduon kan grupo na panahon na ngani pakusugon kan gobierno asin lokal na gobierno an kaaraman kan publiko mapadapit sa tamang pagtapok asin pagsegregate kan basura.
Nangapudan man an environmental group na gibohong parte kan formal waste management system an mga informal waste workers asin tawan sinda nin social asin health benefits, training, asin mas ligtas na kondisyon sa pagtatrabaho.
Magigirumduman na nag-viral ngonian na semana an Redemptorist Water Channel sa Baclaran River makalihis na mabuyagyag an dakulang kantidad nin basura kasunod kan makusog na pag-uran sa Metro Manila.
