LEGAZPI CITY—Pighayag ni Ecowaste Coalition Zero waste campaigner Ochie Tolentino na dae kuta mangyayari an pagtambak nin mga basura sa parte kan Metro Manila makalihis an mga naranasang raot nin panahon kun nasusunod sana an Republic Act No. 9003 o Ecological Solid Waste Management Act of 2000.
Segun ki Tolentino, sa intrevista kan Bombo Radyo Legazpi, dae ini mangyayari kun may maayos na sistema o pagmamanehar kan mga basura hale sa kaharongan, mga barangay mga ciudad o munisipyo.
Pagdoon pa niya na kun tatabangan man kan Department of Environment and Natural Resources asin non-government organization an mga barangay asin munisipyo sa pagkolekta nin basura dae man kuta nangyari an pagtambak nin mga basura.
Segun pa saiya na bako man solusyon an waste-to-energy na teknolohiya o an pagsulo sa mga basura imbes dapat na gibohon an pag-segregate kan basura sa nabubulok, di-nabubulok, asin recyclable.
Dakula man na bagay an magtagama nin pondo an barangay asin munisipyo para sa information and education sa mga kaharongan mapadapit sa tamang solusyon o mga paagi sa pagtapok nin basura.
Tinawan-doon ni Tolentino na kun ma-address an tunay na ugat kan problemang ini an para saiya dae na masusurpresa an namamanwaan na igwang siring na bulto kan basura na mangyayari sa masunod na habagat o iba pang raot nin panahon.
