LEGAZPI CITY- Pinuunan na kan Albay Provincial Veterinary Office an ebalwasyon para sa mga barangay asin lokal na gobierno na matanos na nakakapag implementar kan mga programa kontra sa rabies.
Ini an katakod kan ikatulong taon kan ‘Search for the Provincial Outstanding Rabies Prevention and Control Program Implementer.’
Segun ki Albay veterinarian Dr. Pancho Mella sa intrevista kan Bombo Radyo Legazpi na an team kan validators an kumpwesto kan veterinary office, Provincial Health Office asin Albay Public Safety and Emergency Management Office.
An best local government unit an makakaresibe nin P100,000 mantang an second place an makakaresibe nin P75,000 mantang P50,000 man an mareresibe kan 3rd placer.
Sa barangay level man, makakaresibe an manggagana nin P75,000 mantang P50,000 sa second placer asin P30,000 man sa third placer.
Dugang pa ni Mella na an gabos na mga barangay man na mapipili an makakaresibe nin tig-P10,000 kada saro.
Kaibanan sa mga pighihiling an pag-implementar nin rabies vaccination, nagpaparehistro nin mga ayam sa barangay, pagkakaigwa nin record sa pagdadakop nin mga violators asin pagbabalangibog dapit sa pag-ibitar sa paglakop kan rabies virus.
Nagtutubod an opisyal na sa paagi kan nasabing pagbisto an magtataong inspirasyon sa mga barangay asin lokal na gobierno ngani na mas ganahan pa sa pagpapaotob kan programa.
