LEGAZPI CITY- Pinag-aaram pa sa ngunyan kan mga otoridad an pagkakabisto kan duwang miyembro kan NPAna nagadan sa nangyaring engkwentro sa Barangay San Ramon, Barcelona, Sorsogon.
Sa intrevista kan Bombo Radyo Legazpi kay Lt. Col. Marlon Mojica an Commanding Officer kan 31st Infantry Batallion kan Philippine Army, nangyari an engkwentro makalihis na magreport an nagkapirang mga residentes manungod sa mga nahihiling na armadong kalalakihan sa mabulod na parte kan lugar.
Huli digdi, magkaibang nagresponde an 31st Infantry Batallion, Scout Platoon, 1st Provincial Mobile Force Company, Sorsogon Provincial Police Office asin mga personahes kan Barcelona PNP.
Tulos na nagkaribayan nin putok an mag-inibong na lado kan mahiling kan mga otoridad an nasa 20 miyembro kan NPA.
Naghaloy man nin lampas kabangang oras an putokan hasta sa magdurulag na paparayo an mga rebelde.
Nagadan sa engkwentro an duwang miyembro kan NPA, sarong babaye asin sarong lalaki na pinag-aaram pa sa ngunyan kan mga otoridad an pagkakabisto.
Narekober man an tolong M16 rifles, anti-personnel mines, mga sobersibong dokumentos asin iba pang mga gamit kan NPA.
Wara man nin naireport na nakulogan sa lado kan mga otoridad.
Sa ngunyan inalerto na kan mga otoridad an iba pang estasyon nin pulis mantang nagkaag naman nin mga checkpoints asin may nagpapatrolya na nganing madakop an nakadulag na iba pang miyembro kan mga rebelde.
