LEGAZPI CITY- Uminabot na sa rehiyong Bicol an nasa 20 na mga dugang na rubber boats na makakatabang para sa nagpapadagos na pagresponde sa mga naapektaran nin mga pagbaha sa rehiyong Bicol.
Segun ki Police Regional Office 5 Director Police Brig. General Andre Dizon sa intrevista kan Bombo Radyo Legazpi na dakulang tabang an nasabing water assets para sa pagsustenir na rescue, recovery asin paghahatod nin asistensya sa mga biktima kan kalamidad.
Naipadara an mga ini sa Philippine National Police, Philippine Army, Philippine Navy, Philippine Coast Guard asin Bureau of Fire Protection.
Napag-araman na kasuudma kaya, ginibo munang prayoridad an pagpapadara nin pagkaon sa mga naapektaran kan bagyong Kristine huli ta an iba sa mga biktima an naubusan na nin suplay.
Mientras tanto, basado sa datos na kapot kan mga kapulisan nasa 26 na an nairehistrong binawian nin buhay, siyam an injured asin tulo an nagtetenir na nawawara.
Katakod kaini, nilinaw man ni Dizon na isasapinal pa an nasabing datos ngani na madeterminar kun an nasabing mga casualties an anas maikokunsiderar na konektado sa nakalihis na bagyo.
Dugang pa ni Dizon na igwa man na nasa 900 na mga PNP personnel an naapektaran kan mga pagbaha asin igwang mga hepatura asin mobile matrols an binaha.
