LEGAZPI CITY—Padagos na pigmo-monitor kan Department of Trade and Industry (DTI) Albay an presyo kan mga noche buena products sa probinsya.
Segun ki Noel Bunao, an Provincial Director kan DTI Albay, sa intrevista kan Bombo Radyo Legazpi, na base sa saindang monitoring nagkokomple an mga establisimiento sa price guide na ipinaluwas kan saindang ahensya.
Mientrastanto, dugang man kan opisyal na sainda man na ipig-monitor an mga presyo kan mga paputok.
Pigtaram kaini na en kaso magbakal nin mga paputok hilingon kun locally-made ini, asin ihilingon an labels siring kan classification kan paputok, brand name, address kan manufacturer asin mga intruksiyon sa paggamit kaini.
Abiso man kan opisyal sa publiko na planuhon nin maray an pagbakal an mga kaipuhan sa pagselebrar nin kapaskuhan siring man an paghiling kan mga expiration date kan mga produkto para masierto na ini ligtas asin tama.
